Rais wa Urusi Vladimir Putin ameialika Ukraine kushiriki katika "mazungumzo ya moja kwa moja" tarehe 15 Mei, saa chache baada ya viongozi wa Ulaya kuitaka Moscow kukubali kusitishwa kwa mapigano kwa siku 30.

Katika hotuba ya nadra ya runinga ya usiku wa manane kutoka Kremlin, Putin alisema Urusi ilikuwa inatafuta "mazungumzo mazito" yenye lengo la "kusonga mbele kuelekea amani ya kudumu na yenye nguvu".

Mapema Jumamosi, Waziri Mkuu wa Uingereza Sir Keir Starmer alisafiri hadi Kyiv na wenzake kutoka Ufaransa, Ujerumani na Poland kuweka shinikizo kwa Urusi kujitolea kusitisha mapigano bila masharti, kuanzia Jumatatu.

Msemaji wa Kremlin Dmitry Peskov baadaye alisema Moscow "italazimika kufikiria hili", lakini akaonya kwamba "kujaribu kutushinikiza ni bure".

Katika taarifa yake mwenyewe, Putin alisema hawezi "kuondoa" uwezekano kwamba mazungumzo hayo yanaweza kusababisha Urusi na Ukraine kukubaliana "mapatano mapya". Lakini hakushughulikia wito wa kusitisha mapigano moja kwa moja kwa siku 30.

Kiongozi huyo wa Urusi alisema mazungumzo yaliyopendekezwa yanapaswa kufanyika katika mji wa Istanbul Uturuki, kama yalivyokuwa hapo awali, na kwamba atazungumza na Rais wa Uturuki Recep Tayyip Erdogan siku ya Jumapili kuzungumzia maelezo hayo.

Kyiv haijaitikia mwaliko huo.

Mji mkuu wa Ukraine ulikuwa mwenyeji siku ya Jumamosi na Sir Keir, Mfaransa Emmanuel Macron, Mjerumani Friedrich Merz na Donald Tusk wa Poland, ambao ni sehemu ya "muungano wa walio tayari"- kundi la nchi zilizojitolea kuunga mkono Ukraine.

Pamoja na Rais wa Ukraine Volodymyr Zelensky, walishiriki katika mkutano wa pamoja wa wanahabari.

Viongozi hao walionya kwamba vikwazo "vipya na vikubwa" vitawekwa kwa sekta ya nishati na benki ya Urusi iwapo Putin hatakubali usitishaji vita usio na masharti wa siku 30 "angani, baharini na nchi kavu".

CHANZO: MTANDAO