Chama cha Waajiri Tanzania (ATE) kwa kushirikiana na Taasisi ya Usimamizi wa Afrika Mashariki na Kusini (ESAMI) kimezindua rasmi Kundi la 11 la Mpango wa Mustakabali wa Wanawake Tanzania (Female Future Programme – FFP) katika hafla iliyofanyika Jijini Dar es Salaam.

Hafla hiyo ilihudhuriwa na wadau mbalimbali wa sekta ya ajira na uongozi, akiwemo Mkurugenzi Mkuu wa ATE, Suzanne Ndomba-Doran, Mkurugenzi Mkuu wa ESAMI, Dk. Peter Kiuluku, wawakilishi wa Shirikisho la Waajiri wa Norway (NHO), viongozi wa mashirika, wanahabari, na washiriki wa programu hiyo.

Katika hotuba yake ya ufunguzi, Suzanne Ndomba-Doran amewapongeza washiriki wapya wa Kundi la 11, akieleza kuwa mpango huo umeendelea kuwa nyenzo muhimu ya kuwaandaa wanawake kwa nafasi za uongozi katika sekta binafsi na za umma.

"Mpango wa Mustakabali wa Wanawake sio tu mafunzo ya kawaida ya uongozi bali ni safari ya mabadiliko. Unawawezesha washiriki kuondoka kwenye maeneo yao ya faraja, kukuza ujasiri, na kujiandaa kwa nafasi za juu za uongozi kwa kujiamini," amesema Ndomba-Doran.

Jumla ya washiriki 160 kutoka kampuni 36 wanashiriki katika mpango huo, ikiwa ni kundi kubwa zaidi kuwahi kushiriki tangu kuanzishwa kwake mwaka 2016. Mpango huo umekuwa chachu ya mabadiliko, ukiwawezesha wanawake zaidi ya 600 kupanda ngazi za uongozi, wakiwemo wabunge na wakurugenzi wa mashirika mbalimbali.

Mwelekeo Mpya: Kujenga Uongozi Imara wa Wanawake

Katika hotuba yake, Suzanne Ndomba-Doran pia amesisitiza umuhimu wa kuwekeza katika maendeleo ya wanawake kwa ustawi wa taifa.

"Usawa wa kijinsia si suala la haki pekee, bali ni msingi wa maendeleo ya uchumi na biashara endelevu. Tunapaswa kuendelea kuhamasisha sera na mazingira rafiki kazini ili kuhakikisha wanawake wana nafasi sawa za kushiriki kwenye maamuzi muhimu," ameeleza.

Amehimiza mashirika na taasisi kuendeleza mafunzo, programu za ushauri, na mifumo ya kusaidia wanawake ili kufanikisha lengo la kuongeza uwakilishi wa wanawake katika uongozi.

Uongozi wa Wanawake na Mustakabali wa Sekta ya Ajira

Mgeni rasmi katika hafla hiyo, Dk. Peter Kiuluku, ameeleza umuhimu wa kushirikisha wanawake katika uongozi kwa maendeleo ya jamii na uchumi wa taifa.

"Tafiti mbalimbali zinaonyesha kuwa uwepo wa wanawake katika nafasi za uongozi huongeza ufanisi wa taasisi, uwajibikaji, na uvumbuzi wa kimkakati. Tanzania imepiga hatua, lakini bado tunahitaji kuongeza juhudi kuhakikisha wanawake wanashiriki kikamilifu katika maamuzi ya juu," amesema Dk. Kiuluku.

Amewataka washiriki wa mpango huo kutumia fursa waliyopewa kwa bidii, kujifunza, na kuwa tayari kuleta mageuzi katika sehemu zao za kazi.

Changamoto na Suluhisho kwa Uongozi wa Wanawake

Licha ya mafanikio yaliyopatikana, wanawake bado wanakumbana na changamoto kadhaa katika safari yao ya uongozi. Takwimu zinaonyesha kuwa ni asilimia 19 tu ya wakurugenzi wasio watendaji kwenye makampuni yaliyosajiliwa DSE ni wanawake, huku idadi ya wanawake katika nafasi za juu za uongozi ikiwa asilimia 35.

Changamoto kubwa zinazoendelea kuwakabili wanawake ni pamoja na:

• ✍🏿Dhahania za kijinsia zinazowazuia kupata nafasi za juu,
• ✍🏿Changamoto za kusawazisha kazi na familia,
• ✍🏿Upungufu wa mitandao ya kitaaluma na nafasi za kushirikiana,
• ✍🏿Ukosefu wa mifumo thabiti ya kusaidia wanawake katika ukuaji wa taaluma zao.
• 
  

Kwa kutambua changamoto hizo, Mpango wa Mustakabali wa Wanawake unatoa mafunzo ya kina ya uongozi, maamuzi ya kimkakati, mbinu za kushiriki katika bodi za maamuzi, na stadi za kujadiliana ili kuwawezesha wanawake kupenya katika nafasi za juu za maamuzi.