Gesi ya kupikia ni safi na salama,tuitumie-EWURA

By Mwandishi Wetu , Nipashe

Published at 01:38 PM May 31 2025

Mhandisi Mbarouk Shaame, Mkaguzi wa bidhaa za Petroli EWURA

Mamlaka ya Udhibiti wa Huduma za Nishati na Maji (EWURA) imeendelea kutoa hamasa kwa wadau mbalimbali mkoani Iringa kutumia gesi ya kupikia (LPG) ambayo ni nishati safi, ya uhakika na inayotunza afya na mazingira.

Mhandisi Mbarouk Shaame, Mkaguzi wa bidhaa za Petroli EWURA, akitoa mada kwa mama lishe, waendesha bodaboda, wauzaji na wasambazaji wa LPG mkoani hapo, jana Ijumaa, 30/5/25, alisisitiza kuwa EWURA huhakikisha vigezo vya usalama wakati wa uagizaji, uhifadhi, usambazaji na usafirishaji wa gesi ya kupikia vinazingatiwa ili nishati hiyo isilete madhara kwa watu, mali na mazingira.

Shaame alieleza kuwa, EWURA husimamia mlolongo mzima wa biashara ya gesi ya kupikia (LPG)nchini kwa kushirikiana na taasisi nyingine ikiwemo NEMC, TBS na Wakala wa Vipimo ili kuweka mazingira wezeshi ya uwekezaji na upatikanaji wa nishati hiyo huku ikichagiza utekelezaji wa mkakati wa kitaifa wa nishati safi ya kupikia.

Akihitimisha semina hiyo, Meneja wa EWURA Kanda ya Kati, Mha. Hawa Shani Lweno, alitoa mwito kwa watanzania kuchangamkia fursa ya biashara ya kusambaza gesi ya kupikia(LPG) ili kusogeza huduma hususani katika maeneo ya pembezoni, ambapo alisiitiza kuwa EWURA hutoa leseni na vibali kwa njia rahisi na rafiki kupitia mfumo wa kieletroni wa LOIS.