Aliyewahi kuwa Katibu Mkuu wa Jumuiya ya Afrika Mashariki (EAC) kati ya mwaka 2006 na 2011, Balozi Juma Volter Mwapachu, amefariki dunia jana Machi 28, 2025, jijini Dar es Salaam.

Licha ya kushika nyadhifa mbalimbali, ikiwemo Balozi wa Tanzania nchini Ufaransa na Rais wa Taasisi ya Sekta Binafsi Tanzania (TPSF), Balozi Mwapachu anakumbukwa pia kwa kujitoa CCM Oktoba 2015 na kujiunga na upinzani akiunga mkono juhudi za Edward Lowassa, kisha kurejea CCM mwaka 2016.

Kwa mujibu wa wanafamilia, mwanadiplomasia huyo mashuhuri amefariki leo Ijumaa jioni jijini Dar es Salaam. "Sasa tunajiandaa na utaratibu wa mazishi ya mpendwa wetu Balozi Mwapachu," kimeeleza chanzo kutoka familia yake, huku chanzo cha kifo chake kikiwa bado hakijawekwa wazi.

Wasifu wa Balozi Mwapachu

Balozi Juma Volter Mwapachu alizaliwa Septemba 27, 1942, jijini Mwanza, Tanzania. Katika safari yake ya maisha, alihusika zaidi katika utumishi wa umma, diplomasia, na sekta binafsi.

Elimu

Balozi Mwapachu alipata Shahada ya Sheria kutoka Chuo Kikuu cha Dar es Salaam mwaka 1969, kisha akapata Diploma ya Uzamili ya Sheria ya Kimataifa na Diplomasia kutoka Chuo cha India cha Sheria na Diplomasia cha Kimataifa, New Delhi. Aidha, mwaka 2005, Chuo Kikuu cha Dar es Salaam kilimtunuku Shahada ya Heshima ya Udaktari wa Fasihi kwa kutambua mchango wake.

Kazi

Katika miaka ya 1970, Balozi Mwapachu alihudumu katika Wizara ya Serikali za Mitaa na Tawala za Mikoa na baadaye kama Kamishna Mkuu wa Tanzania nchini India. Kuanzia mwaka 2002 hadi 2006, alikuwa Balozi wa Tanzania nchini Ufaransa na mjumbe wa kudumu wa nchi hiyo kwenye UNESCO.

Aprili 2006, aliteuliwa na Rais wa Awamu ya Nne, Dk. Jakaya Mrisho Kikwete, kuwa Katibu Mkuu wa Jumuiya ya Afrika Mashariki (EAC), nafasi aliyoitumikia hadi mwaka 2011, akimrithi Amanya Mushega wa Uganda.

Mbali na majukumu hayo, Balozi Mwapachu aliwahi kuwa Mwenyekiti wa Bodi ya Wakurugenzi wa Shirika la Reli Tanzania, Shirikisho la Wenye Viwanda Tanzania, na Baraza la Biashara la Afrika Mashariki. Pia, alihudumu kama Kamishna wa Tume ya Rais ya Marekebisho ya Sekta ya Mashirika ya Umma na mjumbe wa tume kadhaa za urais, akichangia Dira ya Maendeleo ya Tanzania ya 2025.

Urithi na Machapisho

Balozi Mwapachu alitambulika pia kama mtetezi wa kubadilishana maarifa, akiandika vitabu na makala kadhaa zinazoangazia mabadiliko na maendeleo ya Tanzania. Agosti 2023, alitoa tawasifu yake yenye jina Safari, ambayo inajumuisha hotuba zake kuu na maandishi yake, ikitoa maarifa kuhusu taaluma yake na uzoefu wa kibinafsi.

Pia, aliwahi kuwa Rais wa Kongamano na Makamu Mwenyekiti wa Baraza la Uongozi la Chuo Kikuu cha Dar es Salaam, pamoja na Mwenyekiti wa Baraza la Chuo Kikuu cha Dodoma.

Kifo cha Balozi Mwapachu kinatajwa kuwa pigo kubwa kwa Tanzania na ukanda wa Afrika Mashariki, kutokana na mchango wake katika diplomasia, ushirikiano wa kikanda, na maendeleo ya taifa.