Rais Vladimir Putin ana nia ya kuendelea na mapigano nchini Ukraine hadi nchi za Magharibi zitakaposhughulikia masharti yake ya amani, bila kuchoshwa na vitisho vya Donald Trump vya vikwazo vikali zaidi, na madai yake ya eneo yanaweza kupanuka wakati vikosi vya Urusi vinasonga mbele, vyanzo vitatu vilivyo karibu na Kremlin vilisema.

Putin, ambaye aliamuru wanajeshi wa Urusi kuingia Ukraine mnamo Februari 2022 baada ya miaka minane ya mapigano mashariki mwa nchi hiyo kati ya wanaotaka kujitenga wanaoungwa mkono na Urusi na wanajeshi wa Ukraine, anaamini kuwa uchumi wa Urusi na jeshi lake viko imara vya kutosha kukabiliana na hatua zozote za ziada za Magharibi, vyanzo hivyo vilisema.

Trump siku ya Jumatatu alionyesha kusikitishwa na kukataa kwa Putin kukubaliana kusitisha mapigano na akatangaza wimbi la usambazaji wa silaha kwa Ukraine, ikiwa ni pamoja na mifumo ya makombora ya Patriot ya ardhi hadi angani. Pia alitishia kuiwekea Urusi vikwazo zaidi kama makubaliano ya amani hayatafikiwa ndani ya siku 50.

Vyanzo hivyo vitatu vya Urusi, vinavyofahamu fikra za ngazi ya juu ya Kremlin, vilisema Putin hatasimamisha vita kwa shinikizo kutoka kwa nchi za Magharibi na anaamini Urusi - ambayo imenusurika vikwazo vikali vilivyowekwa na nchi za Magharibi- inaweza kustahimili matatizo zaidi ya kiuchumi, ikiwa ni pamoja na kutishiwa kwa ushuru wa Marekani unaolenga wanunuzi wa mafuta ya Urusi.

"Putin anadhani hakuna mtu ambaye amejishughulisha naye kwa dhati kuhusu undani wa amani nchini Ukraine - wakiwemo Wamarekani - kwa hivyo ataendelea hadi apate kile anachotaka," moja ya vyanzo viliiambia Reuters kwa sharti la kutotajwa jina kutokana na unyeti wa suala hilo.