Vifo ajali ya ndege Bangladesh vyafikia 27

By Mwandishi Wetu , Nipashe

Published at 09:07 AM Jul 22 2025

Picha: Mtandao

Ajali ya ndege.

Takriban watu 27 wamefariki baada ya ndege ya mafunzo ya Jeshi la Anga la Bangladesh kuanguka katika chuo huko Dhaka, wamesema maafisa siku ya Jumanne, na watu 88, wakiwemo watoto, wakitibiwa hospitalini.

Ndege ya F-7 BGI ilianguka mara baada ya kupaa jioni siku ya Jumatatu kutoka uwanja wa ndege wa Kurmitola katika mji mkuu katika misheni ya kawaida ya mafunzo. Jeshi lilisema kuwa ndege hiyo ilipata hitilafu ya kimitambo.

Saydur Rahman, msaidizi wa mshauri mkuu wa masuala ya afya, aliwaambia waandishi wa habari kuwa watu 27 wamefariki na 88 wamelazwa hospitalini wakiwa na majeraha ya moto.

Serikali ilitangaza siku ya maombolezo, huku bendera zikiwa nusu mlingoti na maombi maalum katika maeneo yote ya ibada.

Rubani ni miongoni mwa waliofariki katika tukio hilo, jeshi lilisema, na kuongeza kuwa kamati imeundwa kuchunguza kilichotokea.

Ajali hiyo inakuja wiki kadhaa baada ya ndege ya Air India kuanguka katika hosteli ya chuo cha matibabu huko Ahmedabad katika nchi jirani ya India, na kuua watu 241 kati ya 242 waliokuwa ndani na 19 waliokuwa chini katika maafa mabaya zaidi ya anga kuwahi kutokea katika muongo mmoja.