Wasira ataka uwekezaji utazame makundi yote

By Mwandishi Wetu , Nipashe

Published at 06:24 PM Jul 08 2025

Picha Mpigapicha Wetu

Makamu Mwenyekiti wa CCM, Stephen Wasira, akitazama teknolojia ya ufugaji wa Samaki katika maonyesho ya biashara Saba Saba.

MAKAMU Mwenyekiti wa Chama Cha Mapinduzi (CCM) Tanzania Bara, Stephen Wasira, ameishauri serikali kupitia Mamlaka ya Uwekezaji na Maeneo Maalum ya Kiuchumi Tanzania (TISEZA) kuwa karibu na wawekezaji wote wakiwemo wakubwa, wa kati na wa chini ili kuongeza kasi ya kukuza uchumi.

Wasira ameyasema hayo leo alipotembelea Maonesho ya 49 ya Biashara ya Kimataifa Saba Saba yanayoendelea mkoani Dar es Salaam.

Amesema TISEZA ni muhimu katika uchumi wa Tanzania kwa kuwa ndio inayosajili, kuwatia moyo na kuwaelekeza wawekezaji kutoka mataifa mbalimbali.

“Najua mnapokea wawekezaji kutoka mataifa mengine, tuanzishe utaratibu ambao utawapa motisha wawekezaji wa ndani… sekta ambayo inahitaji kuongezewa thamani ni ya kilimo ambayo naamini imeajiri asilimia 65 ya Watanzania.

“Wizara ya Kilimo inafanya jitihada ya kuongeza uzalishaji, inatoa mbolea ya ruzuku kwa wakulima waweze kuzalisha zaidi lakini hiyo haitoshi, kama tukipata wawekezaji wa ndani wa kuongeza thamani ya mazao yao,” amesema.

Ameongeza kuwa ili kufanikiwa kiuchumi lazima wawekezaji wa ndani washawishiwe, watiwe moyo waweze kuwekeza maana wapo Watanzania wengi wanaoweza kufanya hivyo.

“Ili tutoke hapo lazima twende katika viwanda vya nguo sio lazima viwe vikubwa, ukienda India kuna viwanda vidogo vingi sana mmoja anatengeneza nyuzi na anamuuzia anayetengeneza nguo, kwa kufanya hivi tutafanya kilimo kuwa na soko la uhakika na kushusha umasikini,” amesema.