RC Mwanza: Wafanyabiashara changamkini fursa

By Neema Emmanuel , Nipashe

Published at 05:57 PM Sep 03 2025

Picha Neema Emmanuel

Mkuu wa Mkoa wa Mwanza, Said Mtanda (kushoto) akikata utepe ishara ya uzinduzi dawati la wafanyabiashara.

MKUU wa Mkoa wa Mwanza, Said Mtanda, amewataka wafanyabiashara kutumia kikamilifu dawati maalumu la uwezeshaji biashara kwa maendeleo ya taifa, likilenga kusaidia kutatua changamoto kuongeza ufanisi wa biashara.

Akizungumza leo wakati wa uzinduzi wa dawati hilo, Mtanda amesisitiza umuhimu wa kulipa kodi kwa maendeleo ya taifa, akisema kuwa kila Mtanzania anapaswa kuchangia kulingana na uwezo wake.

Pia ameitaka TRA kuhakikisha dawati hilo linafika hadi ngazi ya wilaya ili kuwafikia wafanyabiashara wote.

“Kodi ni suala la kitaifa hatutaweza kuiendesha serikali bila kulipa kodi maendeleo tunayoyaona sasa kwa mfano, daraja la Kigongo Busisi lililozinduliwa hivi karibuni yote ni matokeo ya kodi tunazolipa sisi wenyewe,” amesema Mtanda.

Naye, Meneja wa TRA Mkoa wa Mwanza, Faustine Mdesa, amesema dawati hilo si kwa ajili ya kutoza kodi bali kutoa msaada, kusikiliza changamoto na kuboresha ushirikiano kati ya TRA na walipa kodi.

“Kuanzishwa kwa dawati hili ni utekelezaji wa maagizo ya Rais ya kuboresha mahusiano ya kikazi kati ya TRA na walipa kodi ili kuongeza ulipaji wa hiari na ni maalumu kwa ajili ya kuwatambua, kuwasikiliza na kuwawezesha walipa kodi halihusiani na utozaji kodi bali ni sehemu ya kutoa msaada na suluhisho kwa walipa kodi wadogo na wakubwa,” amefafanua Mdesa.

Akizungumza kwa niaba ya wafanyabiashara wa Mwanza, Jacob Paul alisema kuwa dawati hilo ni neema kwao kwani limewapa matumaini mapya.

“Tumekuwa na kero nyingi bila sehemu rasmi ya kuziwasilisha sasa tumepata sehemu sahihi ya kusaidiwa, na tumeahidi kulitumia kikamilifu,” kupata suluhisho la changamoto zetu”alisema.