Mfanyabiashara maarufu nchini, Rostam Aziz amesema sekta binafsi iko tayari kusaidia kuiongoza nchi kuelekea uchumi wa Dola za Marekani trilioni moja ifikapo mwaka 2050.

Amesema hayo leo jijini Dodoma wakati wa uzinduzi wa Dira ya Maendeleo ya Taifa ya Mwaka 2025-2050, ambapo Rais Samia Suluhu Hassan alikuwa mgeni rasmi.

Akizungumza katika uzinduzi huo, Aziz amesifu ushirikishwaji uliofanyika katika kuandaa dira hiyo na akaahidi kwa dhati ushirikiano wa sekta binafsi katika utekelezaji wake.

Pia, amesisitiza mchango muhimu wa sekta binafsi katika kuchangia maandalizi ya Dira ya Mwaka 2050, akieleza kuwa makadirio ya awali ya pato la taifa kati ya Dola za Marekani bilioni 500 hadi 700 yaliongezwa baada ya hoja zenye uzito kutoka kwa viongozi wa biashara.

“Tunaamini nchi hii inaweza kuvuka Dola za Marekani trilioni moja. Hicho ndicho kiwango cha ndoto na matarajio ambacho Tanzania inastahili,” amesema.

Ametoa wito wa kuanzishwa Mfuko wa Kuendeleza Vipaji wenye thamani ya Dola za Marekani milioni 70 kila mwaka kwa ajili ya kufadhili mafunzo ya vijana 1,000 wenye vipaji vya kipekee kutoka Tanzania katika fani muhimu kama uhandisi, akili bandia (AI), fedha, na sayansi ya data.

Amesema vijana hao wangetumwa kusoma katika vyuo vikuu bora duniani na kurejea nchini kutoa huduma kwa mujibu wa mikataba ya kurejesha maarifa.

Vilevile, amesisitiza umuhimu wa kufanya mageuzi ya haraka katika taasisi za ndani ya nchi, akihimiza kuimarishwa kwa vyuo vikuu vya ndani, kuboreshwa kwa mitaala na kukuza viongozi wa kizalendo ili kuendana na ushindani wa uchumi wa dunia.

“Tusisubiri tu vijana warejee kutoka nje—ni lazima tuchukue hatua sasa kujenga wataalamu wa kiwango cha dunia hapa nyumbani,” amesema.

Akitaja sekta ya viwanda kuwa nguzo kuu ya ukuaji wa uchumi wa viwanda nchini, Aziz ameiomba serikali kuweka sera zitakazolinda na kuzipa kipaumbele sekta za ndani.

Pia, alipendekeza ubalozi wa Tanzania nje ya nchi kuwa na jukumu la makusudi katika kutambua na kuhamasisha wataalamu wa Kitanzania walioko ughaibuni kurudi nyumbani, hasa wale waliopo kwenye sekta bunifu.

Kadhalika, amempongeza Waziri wa Mambo ya Nje, Ushirikiano wa Afrika Mashariki, Mahmood Thabit, kwa kusimamia diplomasia ya kiuchumi na kutumia vipaji vya kimataifa kwa maendeleo ya taifa.

Akizungumzia sekta ya fedha, Aziz amekosoa mifumo ya sasa ya kibenki kuwa ni migumu na haitoi mitaji ya kutosha kwa wajasiriamali wa Kitanzania kukua.

Hivyo alishauri kwamba: “Lazima tubadili mfumo wetu wa kifedha. Hakuna biashara ya ndani inayoweza kustawi chini ya masharti ya sasa ya mikopo".

Amempongeza Rais Samia kwa uongozi wake wa nidhamu katika miaka minne iliyopita, hasa katika nyanja ya maendeleo ya miundombinu.

Pia, amemsifu kwa kukamilisha miradi ya kimkakati, kuanzisha mingine mipya na kujenga utamaduni wa uendelevu wa utawala—mabadiliko aliyoyataja kuwa ya kimtazamo kwa uongozi wa taifa.