Baada ya wanachama wa Chama cha Demokrasia na Maendeleo (CHADEMA), wanaojitambulisha kama kundi la G55, kueleza hadharani kukata tamaa kwao na uongozi wa chama chao, Katibu Mkuu wa Chama cha NLD, Doyo Hassan Doyo, amewaalika rasmi kujiunga na chama chake ili kuendeleza harakati zao za kisiasa.

Tarehe 22 Aprili 2025, wanachama hao walizungumza na waandishi wa habari na kueleza kuguswa na kile walichokitaja kuwa ni kiburi cha viongozi wa juu wa CHADEMA, hasa baada ya kushindwa kusaini kanuni za uchaguzi mkuu unaotarajiwa kufanyika mwaka huu. Tendo hilo, kwa mujibu wao, limewanyima fursa ya kushiriki katika uchaguzi huo kwa mujibu wa taratibu za kitaasisi.

Akizungumza akiwa mkoani Tanga katika shughuli za kuimarisha uhai wa chama cha NLD, Doyo alisema kuwa maelfu ya Watanzania, wakiwemo zaidi ya wanachama 200 wa CHADEMA waliokuwa na dhamira ya kugombea nafasi mbalimbali za uongozi, sasa wamekata tamaa kufuatia msimamo wa chama chao.

“Tunaelewa machungu wanayopitia ndugu zetu wa G55. Walikuwa na nia ya dhati ya kushiriki kwenye mchakato wa kidemokrasia, lakini sasa wamekosa jukwaa la kufanya hivyo kutokana na maamuzi ya uongozi wao,” alisema Doyo.

Kwa upande wake, msemaji wa kundi hilo, John Mrema, alibainisha kuwa wanachama hao walitaka kugombea na kuchaguliwa kwa mujibu wa katiba ya nchi na chama, lakini wamejikuta wakihujumiwa na chama chao wenyewe. “Tumekosa mahali pa kusimamia nia zetu za kisiasa, na tunaona kama tumesalitiwa,” alisema Mrema.

Kutokana na hali hiyo, Doyo amewahimiza wanachama hao kuchukua hatua madhubuti kwa kujiunga na chama cha NLD, ambacho, kwa mujibu wake, ni jukwaa la kweli la kuwatumikia Watanzania.

“Siasa inafanyika popote pale, ni suala la kujiamini,” alisema Doyo. “Mimi mwenyewe nilikuwa katika chama kingine kabla ya kujiunga na NLD. Nawakaribisha kwa mikono miwili ndugu zangu wa G55. Karibuni sana NLD.”Akihitimisha, Doyo alisisitiza kuwa NLD ni jukwaa la matumaini mapya, akisema:
 “NLD ni daraja la demokrasia. Ni chama cha uzalendo, haki na maendeleo. Kwa wote wenye nia njema ya kuleta mabadiliko ya kweli nchini, karibuni sana NLD. Karibuni sana G55.”