WIMBI la vijana wanaojiingiza kuiga utamaduni usiofaa linazidi kuongozeka nchini hali inayoleta wasiwasi wa kukosekana kwa wananchi watakaojenga taifa imara siku za usoni.

Kumekuwapo na matukio kadhaa yanayoharibu baadhi ya vijana na kuwafanya wakose mawazo ya kuliendeleza taifa lao.

Kuna tabia ambayo vijana wa kike na wa kiume imewatawala wanapokwenda kwenye maeneo ya starehe ya kuvuta shisha.

Wengi huwakuta wakipuliza vibuyu vya shisha ambavyo vinakuwa na mchanganyiko wa vitu tofauti vikiwamo dawa za kulevya.

Kwa sasa imegeuka kama fasheni, kijana asipovuta anaonekana mshamba au mtu wa kuja, bila kujua athari yake.

Madhara yanayoweza kusababishwa na uvutaji wa shisha ni kupata kansa ya mapafu kwa sababu tumbaku inayotumika kwenye shisha huwa na kemikali nyingi zinazoweza kusababisha kansa hiyo ikiwa itavutwa kwa muda mrefu.

Uvutaji wa shisha husababisha mkusanyiko wa kamasi kwenye mapafu, jambo linalosababisha magonjwa ya mfumo wa upumuaji kama bronchitis na pumu.

Shisha hutumiwa na watu wengi kwa zamu na vifaa vyake vinaweza kuchukua bakteria au virusi, ambayo husababisha maambukizi kama kikohozi na homa.

Kemikali zinazopatikana kwenye moshi wa shisha zinaweza kusababisha kansa ya mdomo, hasa kwenye ulimi, midomo, na koo.

Uvutaji wa shisha unaongeza uwezekano wa kuoza meno na pia kusababisha harufu mbaya ya kinywa kutokana na kemikali zinazobaki mdomoni.

Watu wanaotegemea shisha kwa burudani mara nyingi wanakuwa na msongo wa mawazo wanaposhindwa kuvuta, hali inayoweza kuathiri afya ya akili.

Kutegemea shisha kwa starehe inaweza kuchochea hali ya kupoteza utulivu wa kihisia na kujikuta katika hali ya kutokuwa na furaha bila kutumia.

Moshi wa shisha unapovutwa ndani ya nyumba au maeneo yasiyo na uingizaji hewa mzuri, husababisha uchafuzi wa hewa ambao unaweza kuathiri afya ya watu wasiovuta walioko karibu.

Kutokana na hali hiyo Tume ya Kurekebisha Sheria Tanzania (LRCT) imeanza mapitio ya sheria zinazohusiana na matumizi ya tumbaku na shisha nchini, ikiwa ni sehemu ya juhudi za kuimarisha ulinzi wa afya ya umma na kudhibiti mmomonyoko wa maadili, hasa kwa vijana.

Tume hiyo imeona umuhimu wa kupitia upya sheria hizo ili kuendana na mabadiliko ya kijamii na kuzuia madhara ya kiafya na kijamii yanayosababishwa na matumizi holela ya shisha na tumbaku.

Vijana wengi wanavutwa na matumizi ya shisha, licha ya athari zake kiafya na kiuchumi. Hali hii inachochea kupungua kwa tija kazini na kuenea kwa tabia zisizofaa.

Kuna michezo ambayo pia inachangia kuharibu watoto ikiwamo ya kubahatisha ambapo Tume hiyo imeanza mchakato wa kupitia sheria zinazogusa michezo ya kubahatisha, kwa lengo la kulinda maadili ya watoto hao na vijana. 

Baadhi ya watoto wanatoroka masomo ili kushiriki katika michezo hiyo inayopatikana kwenye vibanda vya Kamari na kuhatarisha mustakabali wao wa kielimu na kimaadili.

Tume ya Kurekebisha Sheria Tanzania inaendelea na jukumu lake la kuhakikisha sheria za nchi zinakuwa rafiki kwa wananchi, zinaboresha mazingira ya kiuchumi, kijamii na kitaasisi, sambamba na kulinda haki za msingi za binadamu kwa mujibu wa Katiba ya Jamhuri ya Muungano wa Tanzania (1977).